SERIKALI YAOMBWA KUAINISHA MIPAKA KITAME

na Shehe Semtawa, Bagamoyo

WANANCHI wa kijiji cha Kitame, tarafa ya Mwambao, wilaya ya Bagamoyo, wameiomba serikali kuharakisha kuainisha mipaka, ili kupunguza migogoro iliyoko kati yao na Hifadhi ya Wanyamapori ya Sadani.

Akizungumza na waandishi wa habari kwa niaba ya wananchi wenzake mwishoni mwa wiki, Mwenyekiti wa Kijiji cha Kitame, Sylivester Kangwe, alisema kumekuwepo na mgogoro wa muda mrefu wa mipaka kati ya kijiji hicho na hifadhi hiyo, lakini serikali imekuwa ikisuasua kuimaliza.

Kangwe alisema migogoro ya mipaka katika eneo lake imekuwa sugu, hali inayosababisha wananchi kupata adha nyingi ikiwemo kutakiwa kulipa sh 1000 kufika kijiji cha jirani ambacho nacho hakiko katika eneo la hifadhi.

Wamelitaka Shirika la Hifadhi za Taifa Nchini (Tanapa) kuondoa kizuizi hicho katika ardhi ya wananchi, ili wawe huru kutembeleana na kupata huduma muhimu.

Kwa upande wake, Mkuu wa Wilaya ya Bagamoyo, Ahmed Kipozi, amekiri kupata malalamiko hayo kutoka kwa wananchi na kudai kuyashughulikia kwa mujibu wa sheria na hatimaye kuwapatia majibu.

Hata hivyo, Kipozi akiwa katika ziara ya ghafla katika eneo kilipo kizuizi hicho alishuhudia wananchi wakitozwa fedha kupita katika kizuizi hicho, hali iliyomfanya kutoa amri kwa askari wa Tanapa kusitisha suala hilo.

Aliwataka askari hao kuacha kuwanyanyasa wananchi na kuwapa namba yake ya simu viongozi wa vijiji vinavyotumia kupita katika kizuizi hicho, ili wampe taarifa endapo wananyanyaswa na askari hao.

Naye Ofisa Mipango Miji wa Wilaya ya Bagamoyo, Clemence Mkusa, alisema suala la mipaka katika vijiji hivyo tayari limeshashughulikiwa na mapendekezo yako Wizara ya Ardhi na Maendeleo ya Makazi.

Chanzo: Tanzania Daima