MAABARA YAKWAMISHA MASOMO YA SAYANSI

Na Gustaphu Haule, Bagamoyo

IMEBAINIKA kuwa wanafunzi wengi wa shule za sekondari hapa nchini wanashindwa kusoma masomo ya sayansi kutokana na ukosefu wa maabara, vifaa na wataalamu wa kufundisha masomo ya sayansi.

Hali hiyo ilibainishwa na Mkuu wa Shule ya Sekondari Lugoba, iliyopo wilayani Bagamoyo, Abdallah Sakasa, wakati akitoa taarifa juu ya maendeleo ya shule yake katika mahafali ya 21.

Katika taarifa yake alisema moja ya changamoto kubwa iliyoibuka ni pamoja na ukosefu wa wataalamu wa kufundisha masomo ya sayansi na ugumu wa upatikanaji wa vifaa vya kufundishia masomo hayo.

Sakasa alisema, changamoto hizo zimekuwa zikichangia kwa kiasi kikubwa wanafunzi kufanya vibaya mitihani ya sayansi na wengine kukimbia masomo hayo.

"Shule yetu inakabiliwa na changamoto nyingi, ikiwemo hii ya upungufu wa viti na meza za kukalia wanafunzi, vitabu, nyumba za walimu na hata maji, lakini changamoto kubwa ni ukosefu wa maabara kwa wanafunzi wa sayansi.

“Tunaomba Wizara ya Elimu na Mafunzo ya Ufundi kuhakikisha inasimamia na kuweka mikakati ambayo itaweza kuinua mchepuo wa masomo ya sayansi hapa nchini ambapo kwa kufanya hivyo itasaidia kuongeza wataalamu wa masomo hayo,” alisema.

Kwa upande wake Kamishna wa Elimu hapa nchini ambaye alikuwa mgeni rasmi wa mahafali hayo, Profesa Eustella Bhalalusesa, alisema Serikali ipo katika mpango wa kuhakikisha inamaliza changamoto zilizopo katika masomo ya sayansi.

Profesa Bhalalusesa alisema kuwa mpango wa kwanza wa Serikali ulikuwa ni kujenga majengo ya shule pamoja na baadhi ya vyumba vya maabara, lakini mpango wa pili ni kuhakikisha maabara hizo zinakuwa na wataalamu wa kutosha kwa ajili ya kufundisha masomo ya sayansi.

Alisema kwa sasa Serikali imeanzisha mafunzo ya walimu wa masomo ya sayansi na kwamba imepunguza masharti ya kujiunga na masomo hayo hadi katika ngazi ya shahada, ili kuwafanya wanafunzi wanaomaliza kidato cha sita kupata unafuu wa kujiunga na vyuo vya sayansi.

Chanzo: Mtanzania