CCM WATAKIWA KUACHA VISASI

na Julieth Mkireri, Kibaha

MBUNGE wa Kibaha Mjini, Silvester Koka, amewataka viongozi na wanachama wa CCM wilayani hapa kusitisha visasi na kupakana matope vilivyojengwa wakati wa chaguzi za chama na badala yake wajipange kudumisha chama hicho.

Akizungumza katika kikao cha kwanza cha Halmashauri Kuu CCM Wilaya ya Kibaha, Koka alisema wanaCCM hawana budi kuanza kujipanga kwa muda mfupi uliobaki kabla ya uchaguzi mkuu ujao bila kuweka mbele chuki zisizo na msingi.

Akizungumzia wajibu wa viongozi mbalimbali, Koka alibainisha kila kiongozi ana wajibu wa kutambua nafasi yake ya kazi bila kumwachia mtu mmoja afanye kazi za watu kumi, hali inayosababisha wananchi kutupia lawama serikali ambayo haihusiki.

Aidha, aliwaasa viongozi hao kuacha tabia ya kutoa siri za vikao vyao vya ndani hususan vya kamati ya siasa, kwani kwa kufanya hivyo, ni sawa na kukibemenda chama.

Naye Katibu wa CCM Kibaha Mjini, Mwajuma Nyamka, alisema nguzo muhimu kwa sasa ni wanachama kuwakubali viongozi wanaochaguliwa kwa kuwapa ushirikiano, ili kuongeza wanachama wapya na kukiwezesha chama kuendelea kushika dola.

Nyamka alisema kuna kazi kubwa ya kushawishi watu kujiunga na chama na kuongeza wanachama wapya kazi ambayo wanaifanya na wanaendelea kuifanya.

Chanzo: Tanzania Daima