WAZAZI KIBAHA WAASWA KUPENDA ELIMU

Na Gustaphu Haule, Kibaha

WAKAZI wa Wilaya ya Kibaha Vijijini mkoani Pwani, wametakiwa kuacha tabia ya kuwaozesha watoto wao wa kike wakiwa na umri mdogo na badala yake wawaendeleze kielimu ili iweze kuwasaidia katika maisha yao ya baadaye.

Wito huo ulitolewa jana na Mjumbe wa Mkutano Mkuu wa Chama Cha Mapinduzi (CCM) kupitia Umoja wa Wanawake Tanzania (UWT), Janeth Sylvanus, katika mahafali ya Shule ya Sekondari Kilangalanga, iliyopo Mlandizi, Kibaha Pwani.

Sylvanus alisema tabia ya kuwaozesha watoto wa kike wakiwa na umri mdogo ni vitendo vya ukatili ambavyo kwa sasa vinapigwa vita kila siku, hivyo akawataka wazazi wenye tabia hiyo kuacha mara moja tabia hiyo, ili kuwapa fursa watoto hao kuendelea na masomo yao.

Alisema ili kukomesha vitendo hivyo ni vyema Serikali ikaweka mpango madhubuti ambao utawabana wazazi wenye tabia hizo kwa kuwakamata na kuwapeleka katika vyombo vya sheria ikiwemo kufikishwa mahakamani.

“Ndugu zangu elimu ni msingi wa maendeleo kwa kila Mtanzania hivyo ni vizuri kama wazazi wakawa na mwamko wa kuwasomesha watoto wao ili wapate hazina ya baadae lakini vitendo vya kuwaozesha watoto mapema ni kukiuka na kuwanyima haki zao za msingi ,” alisema.

Sylvanus alisema yupo tayari kushirikiana na wazazi pamoja na bodi ya shule hiyo ili kuhakikisha wanaweka misingi sawia itakayowasaidia wanafunzi wa shule hiyo kusoma kwa bidii na kupata elimu bora zaidi.

Katika mahafali hayo, kada huyo aliahidi kuwasomesha wanafunzi 50 wa shule hiyo wanaoishi katika mazingira magumu pamoja na kuwalipia ada wanafunzi 12 wa kidato cha nne watakaofaulu kujiunga na kidato cha tano, mwakani.

Shule ya Sekondari Kilangalanga ilianzishwa mwaka 1995 ikiwa na wanafunzi 80, lakini mpaka sasa inajumla ya wanafunzi 1,499, wakiwamo wavulana 744 na wasichana 755 ambapo hata hivyo wanafunzi wa kidato cha nne wanaohitimu mwaka huu ni 209 wasichana 109 na wavulana 100.

Chanzo: Mtanzania