KITUO MLANDIZI KUWA HOSPITALI

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399. 

 Imeandikwa na John Gagarini, Kibaha

Mbunge wa Kibaha Vijijini, Hamoud Jumaa.

WAZIRI wa Afya, Maendeleo ya Jamii, Jinsia, Wazee na Watoto, Ummy Mwalimu amekubali maombi ya Kituo cha Afya cha Mlandizi kuwa Hospitali ya wilaya.

Alitoa tamko hilo kwenye uwanja wa Mtaongani Mlandizi wilayani Kibaha wakati akipokea magari mawili ya kubeba wagonjwa na vitanda vitatu vya kuzalishia wajawazito kutoka kwa Mbunge wa Jimbo la Kibaha Vijijini, Hamoud Jumaa na gari moja kutoka kwa Rais John Magufuli.

Alisema ombi lililotolewa na mbunge huyo kwa viongozi wa ngazi za juu na kwake amelikubali, hivyo Mganga mkuu wa wilaya anapaswa kuandika barua na kuzipeleka sehemu husika kisha zifikishwe wizarani kwa ajili ya utekelezaji.

“Mbunge wenu amekuwa akipigania kituo hiki kwa muda mrefu kama alivyosema, hivyo naona hakuna kipingamizi ili mradi tu taratibu zifuatwe kufikia hatua hiyo, lengo kubwa ni kuboresha huduma kwa wananchi,” alisema.

Awali Jumaa alisema maombi hayo alishayatoa kwa viongozi mbalimbali ikiwemo kwa Rais wa Awamu ya Nne, Jakaya Kikwete na Rais John Magufuli. Jumaa alisema kuwa kituo hicho kwa sasa kinahudumia watu wengi tofauti na ilivyokuwa zamani ambapo kwa sasa wanakaribia watu 100,000, hivyo kuna haja kabisa ya kuwa hospitali ya wilaya.

CHANZO HABARI LEO