WAZEE KIBAHA WATAUTA FEDHA KUJENGA KITUO CHAO.

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399.

CHAMA cha Wazee wastaafu wa Kibaha Mjini mkoani Pwani kinatafuta Sh mil 400 kwa ajili ya kujenga kituo cha wazee kwenye eneo lao lililopo Chalinze wilayani Bagamoyo.

Kwa mujibu wa Katibu wa chama hicho, Acquiline Ndungwi, wana malengo ya kujenga kijiji cha kisasa cha wastaafu kitakacho gharimu fedha hizo hadi kukamilika.

Ndungwi alisema, kwa sasa wanaendelea kutafuta wadau mbalimbali ambao watawezesha kusaidia kufikia malengo hayo katika eneo lao hilo la ekari 100.

“Kwa kuwa tayari tuna fedha kidogo tunataraji ujenzi huo kuanza wakati wowote kuanzia sasa, kwani taratibu zote zinazotakiwa kufuatwa tayari zimekamilishwa na kinachobaki ni kupata fedha kwa ajili hiyo,” alisema Ndungwi.

Alisema, katika harambee iliyofanyika ili kupata fedha za ikuanza ujenzi huo, wameingiziwa zaidi ya Sh mil 12 katika taasisi ya kifedha ya ACB, na Sh mil 1.5 zilizotolewa ahadi hivyo jumla kuwa na Sh mil 13.5.

Kwa upande wake, Mwenyekiti wa chama hicho, Josephina Protas aliwaomba wadau mbalimbali mkoani Pwani na nje ya mkoa huo kujitokeza kushirikiana nao kufikia mipango hiyo itakayoinua wazee kimaendeleo.

Protas alisema mafanikio yao katika mpango huo yatawafanya waweze kujitafutia kwa kujishughulisha na miradi mbalimbali, badala ya kusubiri kuomba misaada. Chama hicho kilianza mwaka 2014 kikiwa na wanachama 15 na sasa kina wanachama 30.

 CHANZO : HABARI LEO.