WASIOENDELEZA VIWANJA KUNYANG'ANYWA.

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399.

Mkuu wa Mkoa wa Pwani, Evarist Ndikilo.

MKUU wa Mkoa wa Pwani, Evarist Ndikilo amemwagiza Mkurugenzi Mtendaji wa Halmashauri ya Mji wa Kibaha kuziandikia barua taasisi mbalimbali zilizochukua viwanja kwenye kitovu cha Mji kwa nini zisinyang’anywe kwa kushindwa kuviendeleza kwa muda mrefu.

Aliyasema hayo mjini Kibaha alipokuwa akizungumza na watendaji wa halmashauri hiyo na kusema kuwa taasisi hizo zimekiuka taratibu za uendelezaji ardhi ambazo huwataka kuendeleza eneo kwa kipindi cha miezi 36.

Ndikilo alisema licha ya taasisi hizo kuandikiwa barua na ofisi yake zikitakiwa kuviendeleza viwanja hivyo mwaka 2015, lakini zilikaidi agizo hilo hivyo kuona kuwa kuna haja ya kuzinyang’anya na kuzipa taasisi nyingine ambazo ziko tayari kujenga kwa wakati.

“Tumeshapitia Kibaha kupanda hadhi na kuwa Manispaa na tunasubiri taratibu mbalimbali ili kukamilika azma hiyo ndiyo maana tulizipatia taasisi hizo eneo lake maalumu kwa ajili ya kujenga ofisi ambazo zingeonesha mandhari nzuri ya mji, lakini walengwa wameshindwa kutekeleza taratibu za uendelezaji,” alisema Ndikilo.

Alisema sheria inaeleza kuwa kama mtu kashindwa kuendeleza eneo kwa kipindi cha miezi 36, halmashauri ina uwezo wa kumnyang’anya na kumpa mwingine ili aendeleze eneo husika, hivyo taasisi hizo zimeshavunja utaratibu.

“Tulitarajia wangejenga majengo ya kisasa ili kuwa kivutio na kwa kuwa inakuwa Manispaa lazima majengo yake yawe mazuri,” alisema Ndikilo. Alisema kuwa nakala za barua hizo zipitie ofisini kwake na kwa Waziri wa Ardhi, Nyumba na Maendeleo ya Makazi kwa ajili ya kuzifutia hati taasisi zilizoshindwa kuendeleza viwanja hivyo ambavyo viko katikati ya mji huo.

CHANZO : HABARI LEO.