MAJAMBAZI YAVAMIA, YAUA POLISI KITUONI

Waliouawa wawili, yapora bunduki saba na risasi kibao, Ni tukio la tatu katika miezi saba, IGP atangaza bingo ya milioni 20/-

Mkuu wa Jeshi la Polisi (IGP), Ernest Mangu.

Matukio ya kuvamia, kuteka, kuwaua askari na kupora silaha katika vituo vya polisi, yameanza kushamiri nchini, hali inayoashiria hatari iliyopo kwa wananchi kwani sasa majambazi yameanza kuvigeuza vituo hivyo kuwa eneo la kujipatia silaha.

 

Katika kipindi cha miezi saba sasa kuanzia Juni, mwaka jana hadi Januari, mwaka huu, vituo vya polisi vitatu vimetekwa, askari polisi watano na mgambo mmoja wameuawa na silaha za aina mbalimbali takribani 20 zimeporwa katika vituo vilivyovamiwa.

 

Uvamizi wa vituo hivyo ulianza katika kituo kidogo cha polisi Mkamba kilichopo wilayani Mkuranga, mkoani Pwani baadaye kituo cha polisi Bukombe kilichopo mkoani Geita na sasa kituo cha polisi Ikwiriri wilayani Rufiji, mkoani Pwani.

 

Katika tukio lililotokea usiku wa kuamkia jana, watu 10 wanaosadikiwa kuwa majambazi wakiwa na silaha za jadi na za moto walikiteka kituo cha polisi Ikwiriri kilichopo Tarafa ya Ikwiriri wilayani Rufiji, mkoani Pwani na kuwaua askari wawili, kupora silaha saba kisha kulipua bomu kituoni hapo.

 

MAELEZO YA RPC

Kamanda wa Polisi Mkoa wa Pwani, Urich Matei, akizungumza na NIPASHE jana, alisema tukio hilo lilitokea saa 8:00 usiku wa kuamkia jana.

 

Kamanda Matei alitaja askari waliouawa katika tukio hilo kuwa ni askari mwenye namba WP 5558 PC Judith Timoth na E.8732 Koplo Edga Mlinga ambaye ni askari wa kikosi cha usalama barabarani na kwamba miili ya askari  imehifadhiwa katika kituo cha afya Ikwiriri.

 

Alisema katika tukio hilo majambazi hao ambao idadi yao haijajulikana, baada ya kukivamia kituo hicho walifanikiwa kuiba bunduki aina ya SMG mbili, SAR mbili, shotgun moja, risasi zaidi ya 60 na bunduki mbili za kulipulia mabomu ya machozi.

 

Kamanda Matei ambaye alikuwa akizungumza akiwa eneo la tukio, alisema baada ya kufanya unyama huo majambazi hao walilipua bomu kituoni hapo ambalo liliharibu gari lenye namba PT 1965 linalotumiwa na Mkuu wa Upelelezi wa Kituo hicho (OCCID) kisha kutokomea kusikojulikana.

 

Alisema kufuatia tukio hilo msako mkali wa kuwabaini watu waliohusika na tukio hilo unafanyika ingawa hadi jana mchana, hakuna mtu aliyekuwa akishikiliwa kuhusika na tukio hilo.

 

KAULI YA DC 

Kwa upande wake, Mkuu wa Wilaya ya Rufiji, Nurdin Babu, alisema majambazi hao ambao wanasadakiwa kuwa 10 walikivamia kituo hicho cha polisi wakiwa na mapanga, visu na silaha za moto, ambazo hata hivyo hakuzitaja.

 

Alisema walipofika kituo hapo walipiga risasi mfululizo hewani na baadaye wakaingia ndani ya kituo na kuanza kuwacharanga kwa mapanga na visu askari hao hadi wakafariki.

 

Babu alisema baada ya kufanya mauaji hayo waliingia katika chumba zilimokuwamo silaha na kuziba zote.

 

Babu alisema baadaye walipiga risasi nyingine hewani ili kuwatisha wananchi wasiweze kusogea kituo kisha walitupa bomu ambalo liliharibu gari la OCCID.

 

Alisema bomu hilo lililorushwa na majambazi hao liliharibu kioo cha gari la OCCID upande wa kushoto na pia walipiga risasi matairi yote ya gari hilo.

 

IGP ATUMA MAKACHERO

Kufuatia tukio hilo, Mkuu wa Jeshi la Polisi (IGP), Ernest Mangu, amemtuma Kamishna wa Operesheni na Mafunzo wa Polisi, Paulo Chagonja pamoja na makachero kadhaa kwenda wilayani Rufiji kuchunguza kwa undani tukio hilo na kuwasaka wahusika.

 

“IGP Mangu ameshatoa agizo na hivi sasa unavyoongea na mimi Kamishna Chagonja na makachero kadhaa wapo njiani wanakwenda Rufiji,” alisema Kaimu Mkurugenzi wa Upelelezi wa Makosa ya Jinai (DCI), Diwani Athumani.

 

CHAGONJA ANENA

Naye Kamishna Chagonja akizungumza na gazeti hili akiwa Rufiji, alisema hadi kufika jana jioni hakuna mtu aliyekuwa amekamatwa kuhusiana na tukio hilo na kwamba msako bado unaendelea.

 

Taarifa zaidi ambazo gazeti hili ilizipata kutoka eneo la tukio zinaeleza kuwa majambazi hao pia walizitoa upepo pikipiki zote zilizokuwapo kituoni hapo ili kuzuia wasifuatiliwe.

 

Taarifa zikizopatikana wakati tunakwenda mitamboni zinaeleza kuwa miili ya askari waliouawa ilipelekwa katika Hospitali ya Wilaya ya Mkuranga na maofisa wa polisi walikuwa wakiendelea na kikao kujadili suala hilo.

 

IGP ATANGAZA BINGO YA MILIONI 20/- 

Msemaji wa Jeshi la Polisi, SSP Advera Bulimba, alisema kufuatia tukio hilo, IGP Mangu ametenga Sh. milioni 20 ambazo zitatolewa kama zawadi kwa mtu ambaye atatoa taarifa zitakazowezesha kukamatwa kwa watu waliofanya tukio hilo.

 

Kamanda Bulimba alisema wananchi wasiwe na wasiwasi kwani jeshi hilo bado lipo imara na kuwataka watoe ushirikiano kwa polisi ili kufanikisha kuwakamatwa kwa waliohusika katika tukio hilo.

 

“IGP Mangu amelaani vikali tukio hilo ambalo ni sawa na la kigaidi ambalo halikubaliki duniani kote, tutahakikisha tunawasaka na kuwatia mbaroni wahusika wote walioua polisi wetu na kupora silaha,” alisema Bulimba akimnukuu IGP.

 

MATUKIO YA MAUAJI YA POLISI

Hili ni tukio la pili kuvamiwa kituo cha polisi katika mkoa wa Pwani na kusababisha mauaji.

 

Tukio la kwanza lilitokea Juni 11, mwaka jana baada ya watu wasiojulikana walipokivamia kituo kidogo cha polisi Mkamba na kusababisha kifo cha askari mmoja na mgambo.

 

 Askari aliyefariki ni mwenye  namba D 9889 koplo Joseph Ngonyani ambaye alifia katika Hospitali ya wilaya ya Mkuranga wakati akitibiwa kutokana na kumkatakata kwa mapanga sehemu mbalimbali za mwili.

 

Katika tukio hilo, mgambo, Venance Francis, naye alifariki wakati akitibiwa katika Hospitali ya Taifa ya Muhimbili (MNH) wakati askari  Mariamu Mkamba aliyejeruhiwa alipatiwa matibabu na kupona.

 

Majambazi hayo katika tukio hilo walipora bunduki aina ya Shortugun tatu, SMG mbili na magazine 30 kila moja ambazo zilikuwa kwenye ghala la muda zikisubili kupelekwa kwenye kituo kikubwa kwenye ghala kuu la silaha.

 

Tukio jingine la kuvamiwa kituo cha polisi lilitokea Septemba mwaka jana katika kituo kikuu cha polisi wilayani Bukombe mkoani Geita ambako askari wawili waliuawa na kujeruhi wengine watatu. na bunduki 10 kuporwa.

 

Mbali na kupora SMG 10, pia inadaiwa walifanikiwa kupora risasi ambazo idadi yake haikutambulika mara moja pamoja na mabomu ya kutupa kwa mkono na kutokomea kusikojulikana.

 

Kamanda wa Polisi mkoa wa Geita, Joseph Konyo, aliwataja askari waliouawa kuwa ni WP 7106  Uria Mwandiga na G. 2615 PC Dustani Kimati na waliojeruhiwa askari namba E.5831 CPL David Ngupama Mwalugelwa aliyejeruhiwa kichwa na usoni  huku akiumizwa mdomo na meno mawili kungooka pamoja na Mohamed Hassan Kilomo ambaye alijeruhiwa kwa risasi kifuani na mguu wa kulia kwa.

 

CHANZO: NIPASHE

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399.