WAUMINI WATAKIWA KUTOTEGEMEA WAFADHILI

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399. 

WASHIRIKA katika makanisa mbalimbali hapa nchini wametakiwa kuongoza katika harambee zinazofanywa kwenye makanisa yao na kuacha kutegemea wafadhili pekee kuwafanyia mambo kama hayo ya maendeleo.

Wito huo umetolewa na Mkurugenzi wa Fedha wa kampuni T/MARC Tanzania, Mark Rajabu, wakati wa hafla ya uchangiaji ujenzi wa kanisa la Tanzania Assemblies Of God (TAG), Picha ya Ndege mjini Kibaha, mkoani Pwani.

Rajabu ambaye alichangia sh milioni 8 kwenye harambee  hiyo, alisema, uchangiaji kwenye shughuli za maendeleo usitegemee zaidi wafadhili, badala yake nguvu zaidi zitumike kwa wanaoandaa na wafadhili wasaidie kukamilisha shughuli iliyolengwa ambayo itakuwa na manufaa zaidi kwa wahusika.

“Kuchangia ujenzi wa kanisa ni moyo na si kama anayechangia ana fedha sana, lakini pia wito wangu washirika waongoze kuonyesha njia katika uchangiaji, ili hata mfadhili anapojitokeza anaongezea nguvu na si kutegemea kila kitu cha kimaendeleo kufanywa na wafadhili,” alisema.

Aidha, Rajabu aliwaasa wananchi katika maeneo mbalimbali, kutumia rasilimali walizo nazo, kusaidiana katika kufanikisha suala la kuleta maendeleo kwenye maeneo husika badala ya kutegemea watu kutoka mbali kusaidia kusukuma gurudumu la maendeleo.

“Wapo watoto wa mitaani, nao si kwamba wamependa kuwa katika hali ile, kinachotakiwa kutoka kwetu ni upendo, kwa kila aliye nacho kumsaidia mwingine badala ya kuwa na roho ya uchoyo na kuendelea kuwaacha wateseke,” alisisitiza.

Alimpongeza Mchungaji wa kanisa hilo kwa hatua ya kuanza ujenzi wa kanisa kubwa,  ambalo kwa kushirikiana na waumini wake wameweza kufikisha ujenzi katika hatua ya ‘rinta’ na kuomba wadau wengine kuwaongezea nguvu kulikamilisha.

 Chanzo:Tanzania Daima