ASKOFU AWASHANGAA WACHUNGAJI WA MAGARI

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399. 

 

MAKAMU Askofu Mkuu wa Kanisa la Tanzania Assemblies of God (TAG), Magnus Muhiche, amesema kuwa anashindwa kuwaelewa baadhi ya wachungaji wanaotanguliza harambee za ununuzi wa magari badala ya kujenga makanisa.

Askofu Muhiche, alisema baadhi ya wachungaji hao wamekuwa wakifanya ibada zao kwenye nyumba za kupangisha na wanapopata waumini zaidi ya 50, wamekuwa wakikimbilia kufanya harambee ya ununuzi wa magari na si kununua kiwanja na kujenga kanisa ili kuondoka kwenye kupanga.

Akizungumza wakati wa hafla ya uchangiaji wa ujenzi wa Kanisa la TAG Picha ya Ndege, Kibaha ulioambatana na kuweka jiwe la msingi juzi, Muhiche aliwaasa wachungaji vijana kuanza na ujenzi wa makanisa na suala la nyumba na magari ni baraka za Mungu wakati wakiendelea na ibada kwa kuwaongoza waumini wao.

“Mimi wachungaji vijana wa namna hii siwaelewi kabisa na sitakaa kuwaelewa, kwani magari na nyumba ni kuzidishiwa kutoka kwa Mungu, ila wapo wachungaji wapo kwenye nyumba za kupanga wanafanya ibada zao, lakini wanapopata waumini 50 tu, wanafanya harambee ya kununua gari la mchungaji na si kujenga kanisa,” alisema.

Awali akisoma risala ya kanisa hilo, Mchungaji Kiongozi Spear Mwaipopo, alisema kanisa hilo lilianzishwa miaka 20 iliyopita, ambapo pamoja na changamoto zinazolikabili, lakini limeweza kuzalisha wachungaji 12 ambao wamefunguliwa makanisa ndani na nje ya Mkoa wa Pwani.

Mwaipopo alisema ujenzi wa kanisa hilo unatarajiwa kugharimu sh milioni 85, ambapo hadi sasa milioni 52 zimetumika katika ujenzi wa ofisi pamoja na kanisa hilo kubwa ambalo limefikia hatua ya ‘linta’.

Katika harambee hiyo, zaidi ya shilingi milioni 2 taslimu zilipatikana na ahadi sh milioni 19, ambazo kati ya hizo, mdau wa maendeleo, Mark Rajabu, alichangia sh milioni 8 kwa ajili ya ununuzi wa mabati ya kuezekea.

Chanzo:Tanzania Daima