Kukua kwa uchumi sio mwisho wa matatizo ya WatanzaniaKukua kwa uchumi sio mwisho wa matatizo ya Watanzania

GAVANA wa Benki Kuu ya Tanzania (B.o.T), Profesa Benno Ndulu amesema Watanzania wanapaswa waelewe kwamba kukua kwa uchumi hakumaanishi ndiyo mwisho wa matatizo yote nchini.

Alisema kuwa kasi ya kudhibiti mfumuko wa bei inaendelea vizuri ikilinganishwa na miezi 18 iliyopita ambapo mfumuko ulikuwa ni zaidi ya asilimia 19.

Prof. Ndulu alitoa kauli hiyo jana wakati akifungua semina ya kuwajengea uwezo na ufahamu waandishi wa habari wa vyombo mbalimbali juu ya kuandika habari za biashara na uchumi inayofanyika mjini Bagamoyo.

‘Tunaamini mfumuko wa bei nchini utaendelea kupungua kwa kiasi kikubwa licha ya baadhi ya nchi duniani kuendelea kuwa katika jitihada za kujikwamua na mdororo wa uchumi,” alisema.

Kuhusu akiba ya fedha za kigeni, Prof. Ndulu alisema B.o.T ina akiba ya kutosha kuweza kukabiliana na hali yoyote ya dharura kama itajitokeza.

Alisema hali ya kiuchumi katika nchi tajiri za Ulaya bado ni tete na hata zile nchi zilizokuwa zikiinukia kwa ajili ya kuhakikisha dunia haiathiriwi kwa wakati mmoja na hali hiyo, zimeanza kurudi nyuma kutokana na kuwa na matatizo madogo madogo.

Alizitaja baadhi ya nchi hizo zinazoinukia kiuchumi na ambazo zimeanza kuwa na matatitzo madogo madogo kuwa ni Brazil, India, China na Indonesia.

Chanzo: Tanzania Daima