CCM waanza kampeni uchaguzi wa serikali za mitaa Pwani

WAKAZI  wa Mkoa wa Pwani wametakiwa kuwa makini kwa kukipa kura Chama Cha Mapinduzi  kwenye uchaguzi wa serikali za mitaa unaotarajia kufanyika mwaka 2014 li kiweze kuendelea kutekeleza ilani kwa kutimiza mahitaji ya wananchi wake katika maeneo mbalimbali.

Wito huo umetolewa jana mjini Kibaha na Katibu wa CCM Mkoa wa Pwani Sauda Mpambalyoto wakati akiongea na wanachama wa jumuiya ya Umoja wa Wanawake (UWT) kata ya Tumbi kwenye mkutano ulioandaliwa kwa ajili ya mke wa mbunge wa jimbo la Kibaha mjini.

Mpambalyoto aliwataka wananchi kutobadilika na badala yake kubaki na msimamo wao wa kuendelea kukipa kura chama hicho ambacho kimeonyesha mabadiliko makubwa kwa kuwaletea maendeleo katika Nyanja mbalimbali.

Aidha  amewataka wananchi wa mji wa Kibaha kuwa karibu na mbunge wao pale wanapoona kuna changamoto inawakabili ili iweze kutatuliwa kwa haraka na kuendelea kufanya mambo mengine ya kimaendeleo.

Kwa upande wake mke wa mbunge wa jimbo hilo Selina Koka amesema kuwa  aliwataka wanawake kutojibweteka na badala yake kuendelea kushirikiana katika mambo ya ujasiriamali ambayo yatawasaidia kuondokana na hali ya utegemezi .

Koka katika mkutano huo ameahidi kuchangia shilingi million 2.5 kwenye matawi matano ya kata hiyo ili wanawake waendelee kujiinua kwenye shughuli za ujasiriamali na kuwaahidi kuendelea kushirikiana nao pale wanapokua na matatizo kwenye vikundi vyao.

Kata hiyo inawanachama 557 wa UWT , inakabiliwa na changamoto ya kutokua na ofisi ya UWT ya kata, pamoja na baadhi ya wanachama kutokua na mwamko wa kulipia kadi zao kwa wakati na hivyo kufanya idadi ya wanachama hai kuwa 272.