Moshi wasababisha ajali Rufiji, wawili wapoteza maisha papo hapo

TABIA ya baadhi ya watu kuchafua mazingira kwa kuchoma moto nyasi ama mazao yao yaliyopo kando ya barabara kuu imesababisha vifo vya watu wawili huku wengine zaidi ya 30 wakinusurika kifo katika barabara ya Rufiji Lindi jirani kabisa na daraja la Mkapa wilayani humo.

Kwa mujibu wa Kaimu Kamanda wa Polisi mkoani Pwani Yusufu Ali amesema watu wawili Abdalah Said (30) mkazi wa Umwe na  Yahaya Shamte (35) mkazi wa Mgomba Ikwiriri wamekufa papo hapo baada ya kugongwa na basi mali ya kampuni ya Najma wakati walipokuwa wakisafiri na pikipiki kwenye barabara hiyo.

Kamanda Ali amesema wakati wa tukio hilo kulikuwepo na moshi mkubwa uliotanda eneo kubwa inalozunguka barabara hiyo katika kijiji cha Kwangayoga hali ambayo ilimsababisha dereva wa pikipiki T 600 CBD aina ya Sunlg kushindwa kuona mbele vizuri na hivyo kukutana uso kwa uso na basi T 599 CBL aina ya Youtong mali ya Najma iliyokuwa ikiedeshwa na Said Ali(40).

Amesema ajali hiyo ilikuwa mbaya kwani marehemu waliburuzwa katika lami na miili yao kusagika vibaya huku mmoja akikatika kichwa na kwamba chanzo cha ajali hiyo ni moshi huo wa moto na kwamba tayari dereva wa basi anashikiliwa na Polisi.

Katika hatua ingine raia watatu wa Ethiopia wanashikiliwa na Polisi Pwani kwa tuhuma za kukutwa wakiwa wameingia nchini bila kuwa na kibali kwa kutumia njia ya usafiri wa baharini kutoka nchini Kenya.

Kamanada Ali amesema watuhumiwa hao Jahmato Sabiro (20), Danana Dadebo (25) na Elias Chamuso (24) walikamatwa juzi mchana saa 7.30 huko kijiji cha Kilomo kata ya Zinga Bagamoyo na watakabidhiwa kwa Idara za Uhamiaji kwa taratibu zingine za kisherio