Ajali yaua wanne papo hapo, wengine wanne wajeruhiwa

WATU wanne wamekufa papo hapo na wengine wanne kujeruhiwa sehemu mbalimbali za miili baada ya magari mawili tofauti waliokuwa wakisafiria kugongana uso kwa uso huko Vigwaza  Wilayani Bagamoyo mkoani Pwani .

Tukio hilo limetokea majira ya saa 12.30 jioni Julai 13 katika barabara kuu ya Dar esalaam Morogoro na imehusisha gari T 610 Toyota Mark 11 ikiendeshwa na Venas Kimaro (44) mfanyabiashara kuelekea Chalinze na gari ingine ni T 813 BZP Isuzu mini Bus iliyokuwa ikitokea Chalinze.

Ajali hiyo inatajwa kuwa ni miongoni mwa ajali mbaya za barabarani kutokana gari dogo kufinyangwa mithili ya karatasi huku pia miili ya marehemu ikiharibika vibaya kwa kukandamizwa na bodi ya gari hiyo.

Kaimu Kamanda wa Polisi Mkoani Pwani Yusufu Ali amethibitisha tukio hilo ambapo alisema watu wote wanne waliokufa walikuwa kwenye gari dogo na kwamba marehemu mmoja ndiye katambulika ambaye ni dereva Kimaro na hadi asubuhi ya Julai 14 miili mingine mitatu ilikuwa bado haijatambuliwa na ndugu na jamaa zao.

Kamanda Ali ambaye pia ni Afisa upelelezi wa Polisi mkoani Pwani (RCO) amesema ajali hiyo ilitokea baada ya kupasuka tairi la mbele hivyo kupoteza muelekeo na kugongana uso kwa uso Isuzu hiyo na kusababisha vifo hivyo na majeruhi wanne kwenye basi hilo.

Amesema miili ya marehemu wote ilipelekwa kuhifadhiwa katika hospitali ya Tumbi na majeruhi wanne nao wanaendelea kutibiwa hapo hapo Tumbi na hali zao zinaendelea vema.

Kaimu Kamando huyo ameongeza kuwa uchunguzi wa awali umeonyesha chanzo cha ajali hiyo ni mwendo kasi wa dereva wa gari dogo hivyo kupelekea kupasuka tairi na kugongana uso kwa uso na Isuzu.