Pwani yaombwa kufungua barabara

 na Julieth Mkireri, Kibaha

MJUMBE wa Halmashauri Kuu ya Taifa (NEC) kupitia Chama cha Mapinduzi (CCM) Wilaya ya Kibaha Mjini, Rugemalila Rutatina, ameiomba serikali ya Mkoa wa Pwani kufungua barabara za ndani ili kuwezesha wafanyabiashara kusafirisha bidhaa kwa urahisi.

Rutatina alitoa ombi hilo mwishoni mwa wiki alipozungumza na waandishi wa habari na kusema ni vema serikali ya mkoa ikafanya jitihada za kufungua barabara hizo ambazo hutumiwa na wafanyabiashara wengi wakiwamo vijana ambao wanajishughulisha na shughuli za ujasiriamali, ili waweze kusafirisha mazao yao bila usumbufu.

Aidha, alisema kuwa suala la ajira kwa vijana ndani ya taifa bado ni tatizo kubwa ingawa serikali inaendelea kuweka mikakati ya kuhakikisha tatizo hilo linakomeshwa, hivyo ni jambo jema endapo barabara zilizopo ndani ya mikoa zinazounganisha wilaya zitafunguliwa ili zisaidie wakulima na wajasiriamali vijana kusafirisha bidhaa zao kwa urahisi..

Alisema ili kufikia lengo la kutoa ajira kwa vijana ni vema serikali ikafungua barabara zinazounganisha wilaya zake kama vile Bagamoyo -Kibaha, Kisarawe - Mkuranga na nyinginezo ambazo zitawasaidia wananchi hususan wakulima kupata unafuu wa masoko.

CHANZO TANZANIA DAIMA