WATENDAJI HALIMASHAURI KIBAHA KIKWAZO CHA UWEKEZAJI KATIKA ELIMU

Mwandishi wetu, Pwani

 

UONGOZI wa bodi ya wakurugenzi katika shule ya awali na msingi ya Kibaha Independent (KIPS) mjini Kibaha umesema unasikitishwa na vikwazo mbalimbali vya upatikanaji wa eneo la ardhi vinavyowekwa na baadhi ya watendaji wa halmashauri ya mji  huo ambapo kwa zaidi ya miaka minne sasa wamekuwa wakiomba kupatiwa kwa ajili ya ujenzi wa sekondari lakini wamekuw awakipigwa dana dana tu.

Mwenyekiti wa Bodi ya Wakurugenzi wa KIPS Alhaji Yusuph Mfinanga amesema wao kama wawekezaji walikuwa na mpango wa kuendelea kujikita zaidi kwenye sekta ya elimu lakini sasa wameanza kukata tamaa kutokana na kukosa eneo la kujenga sekondari.

 

Alhaji Mfinanga aliyasema hayo wakati akitoa taarifa ya maendeleo ya shule hiyo kwenye mahafali ya saba ya darasa la saba iliyofanyika katika eneo la Mkoani mjini Kibaha.

 

Amesema ni zaidi ya miaka nne sasa tangu uongozi wa shule hiyo ukiomba kupatiwa eneo la kiwanja kwa ajili ya upanuzi wa shule hiyo pamoja na ujenzi wa Sekondari kwa lengo la kuwekeza zaidi katika sekta hiyo lakini halmashauri hiyo imekuwa ikiwazungusha licha ya kuwepo maeneo mengi yaliyopimwa ikiwemo lile eneo la Tamco na mtaa wa machinjioni.

 

Mwenyekiti huyo amesema tangu muda huo tayari shule imewasilisha maombi katika mamlaka husika lakini bado hawajapata eneo hilo hali ambayo alisema inawarudisha nyuma wao kama wawekezaji kwenye shughuli za maendeleo.

 

Aidha Uongozi huo kwa mara ingine umeiomba Serikali ishirikiane nao kikamilifu katika kuleta mapinduzi ya kielimu kwa kuwapa mawazo, ushauri na mchango wa hali na mali ambao wataudhamini katika kufanikisha ukuaji wa maendeleo Kibaha

 

Blogzamikoa