HUYU MWIZI ATUFUNZE KUKAMATA WEZI

Niwe mkweli; nilichukia sana kwa wezi na matapeli kupachikwa a.k.a. ya “wasanii”. Niliona wazi jinsi mbunifu mwenye uwezo wa kutafsiri ujumbe unaotoka kwenye ubongo hata ukasomeka na watu wa rika zote, anavyopewa hadhi sawa na mjinga asiyejua kutafuta riziki kwa njia halali. Ni tusi kubwa lisilomithilika kwa lugha yoyote duniani, hata akhera!

Lakini hivi majuzi nilianza kufikiria iwapo chuki yangu ilikuwa na tija. Ilikuwa ni baada ya “msanii” (huyu acha nimwite hivyo kwa kweli) kuja kitaani kwangu kabisa, akacheza muvi ya ukweli ya nusu saa na kuondoka. Kila shuhuda alishangazwa na baadhi walijikuta wakishangilia baada ya kuielewa picha ile. Jamaa alicheza sini nne za muvi halisi ambayo bila shaka baadaye inaweza kuigizwa.

Picha lilianza jamaa akiwasili na taxi iliyojulikana baadaye kuwa ilikodiwa Buguruni. Lokesheni ilikuwa nyumbani kwa mjumbe wa shina wa chama tawala, akajitambulisha kuwa ni ndugu wa mkazi wa kitongojini hapo aliyefariki dunia ghafla. Hivyo, baada ya kupata taarifa, amekuja ili kumpumzisha nduguye kwenye nyumba yake ya milele.

Baada ya kutoa pole, mjumbe alimwelekeza jamaa njia za kufuata; aende Serikali ya Mtaa kupata barua ya uthibitisho Kiserikali, na kanisani au msikitini kwa huduma za kiroho kwa marehemu. Jamaa alijibu kuwa alilitambua hilo, na pale alipo yupo kamili. Alidai kuwa hatua yake ya kwanza katika muda huo ilikuwa ni kuwasiliana na wachimba kaburi na kununua chakula cha waombolezaji.

Mjumbe hakuwa na hiyana, alipiga simu na kufumba na kufumbua wachimbaji walikuwa pale. Jamaa yetu akaomba “profoma invoisi” ya kaburi la kujengwa kwa tofali na kupigwa plasta. Wajenzi walikuwa tayari kuelewana bei badala ya kuambizana kwa viingereza; mara “foma” mara “voisi wanda”.

Jamaa akafungua mlango wa taxi na kupekua kati ya mafaili yake. Alipokosa alichokihitaji alichomoa simu lake la kupangusa na kulichomoa laini. “Nani ana simu yenye chaji?” Wachimbaji walitoa simu zao, akachagua moja yenye kiwango na kutia laini yake. Akawaagiza wachimbaji wengine watangulie kuchimba kaburi. “Ingia kwenye gari tukatoe fedha kwa wakala,” alimuagiza yule mwenye simu.

Jirani na wakala jamaa aliona bucha. Alimuagiza dereva apaki mbele ya bucha. Aliingia pale na kuagiza nyama ya kutosha kwa shughuli ya msiba. Alimuagiza muuza nyama aikatekate kabisa wakati yeye akipata huduma kwa wakala maana alikuwa nyuma ya wakati. Mambo yalitakiwa kwenda fasta sana.

Akavuka upande wa pili kwa wakala: “Naweza kutoa fedha ya kutosha kwenye mtandao wa (kampuni moja ya simu)?” Wakala aliitikia kukubali. Jamaa akabofya “*xxx*xxx#”, lakini ghafla alikunja uso na kujishika chini ya kibofu. “Mnayo huduma ya choo hapa?” Wakala alimwelekeza kilipo choo na kuendelea kuhudumia wateja wengine.

Nusu saa ikapita. Dereva alimfuata wakala kumuuliza ‘wapi bosi?’ Akajibiwa kuwa tangu alipokwenda msalani hakupata kujua nini kilimsibu huko. Alikwenda kumtazama kurudi na swali: “Kwani hauna namba yake ya simu?” Kwa ujumla, iliwachukua zaidi ya saa mbili kutambua kuwa walidanganywa! Haidhuru, walikwenda kuzika mgomba kaburini na maisha yakaendelea kama mwanzo.

Kitu kilichonifanya nimkubali huyu kuwa msanii ni stahimili yake. Alihitaji simu tu, lakini aliwahusisha dereva wa taxi kutoka Buguruni, mjumbe wa nyumba kumi, wachimba kaburi, muuza nyama na wakala. Ukifikiri kwa undani unaweza kudhani kuwa akili za yule mwizi wa simu zilikuwa na kichaa.

Uchaa gani wakati alifanikiwa katika azma yake? Hata kama lengo halikuwa jema mbele za wengi, lakini alifanikiwa.

Msanii anaruhusiwa kuongopa ili lengo lake (kuelimisha) lifanikiwe. Yupo aliyemwimbia mpenzi wake “Sema utakacho... hata ndege nitanunua” wakati yeye binafsi hata baiskeli ilimshinda. Naamini hata yule aliyeimba “Sitarudia tena. Nikirudia tena ning’oe meno...” hakulisema hilo kwa dhati. Laiti angelimwona siku moja mpenzi akimjia na koleo, basi pangechimbika kwelikweli.

Si kwamba namsifia huyu mwizi asiye na haya wala huruma, kwa kutokwa na udenda na kusumbua umati wa watu kwa kitu kidogo sana. Bali mnyonge tumnyonge lakini haki yake tumpe. Ni muhimu huyu mtaalamu asakwe na kukamatwa. Lakini badala ya kutunukiwa kifungo jela, apewe adhabu ya kuufunza umma namna ya kumtambua na kumkwepa mtu wa aina yake.

Kila wakati una changamoto zake. Tulishuhudia wakati ukipita na vifungo vya wavumbuzi wa magobole yaliyotumia risasi za nondo.

Tulishuhudia pia yule bingwa wa mawasiliano wa uswahilini akiukimbia mji wake kutokana na msako mkali wa Jeshi la Polisi dhidi yake. Huyu mtaalamu alizalisha chaneli ya redio iliyozisumbua idhaa za redio za Serikali.

Zama hizi tusimhukumu mwalimu kwa suti zake. Tujali chakula cha ubongo kwa faida ya kizazi chetu na kijacho.

Na sisi tumtumie tapeli wetu hasa katika kipindi hiki cha Uchaguzi Mkuu. Wanaotaka uongozi kwa udanganyifu watakuja na mbinu mpya na za kale. Wanaotajwa kuwa wezi wa kura watakuja na mbinu kama hizo. Tunataka atuelekeze namna ya kuwatambua watu wanaofanana naye.
Chanzo:Mwananchi

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399.