WAFANYABIASHARA KIBAHA WAFUNGA MADUKA

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399. 

WAFANYABIASHARA zaidi ya 50 wa mji wa Kibaha Mkoani Pwani, wamefunga maduka yao kuwaunga mkono wafanyabiashara saba waliofungiwa maduka na Mamlaka ya Mapato (TRA), mkoani hapa kutokana na kukosa mashine za EFD.

Mwenyekiti wa Jumuiya ya wafanyabiashara mkoa wa Pwani, Abdallah Ndauka alisema kuwa Septemba 9 mwaka huu maduka saba ya wafanyabiashara wa mailimoja yalifungiwa, hali iliyosababisha wenzao kuungana nao kutokana na kukosa mashine hizo.

Ndauka, alisema alishangazwa na kitendo cha TRA kufunga maduka hayo huku wakishindwa kukutana na wafanyabiashara hao kujadiliana kuhusiana na matumizi ya mashine hizo.

“Tunataka mabadiliko ya kimfumo, tunahitaji mashine zitambue gharama za manunuzi na uendeshaji kitakachobakia kilipie kodi TRA, lakini pia TRA wanatakiwa kutambua kuwa bidhaa nyingine hazina risiti,” alisema.

Aidha Ndauka alisema, malalamiko yao kwa kushirikiana na Jumuiya ya wafanyabiashara ngazi ya taifa yalishafika kwa Naibu Waziri wa fedha Mwigulu Nchemba ambaye aliahidi kuyafanyia kazi,baada ya kuombwa kukutana na TRA kushughulikia suala hilo.

Naye Mohamed Lutambi, alisema hatua ya kufunga maduka hayo imewaathiri na kuwakandamiza kwa kuwa wanategemea biashara hizo kwa ajili ya kupata fedha za kuendesha maisha yao.

Akizungumzia malalamiko hayo Ofisa Elimu na Huduma kwa Mlipa Kodi wa Mamlaka hiyo, Bakari Kapera, alisema wafanyabiashara waliofungiwa maduka kila mmoja ana kosa lake sio suala la mashine pekee.

Kapera, alisisitiza kuwa mashine za EFD ni sawa na vitabu vya risiti na inatunza kumbukumbu sahihi kwa kila bidhaa inayouzwa, ambapo aliwashauri wafanyabiashara hao kushiriki kwenye mikutano inayoitishwa na mamlaka hiyo badala ya kutuma wawakilishi.

Chanzo:Tanzania Daima