JAFO AHIMIZA UCHANGIAJI MIRADI YA MAJI

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399. 

 

MBUNGE wa Kisarawe, Seleman Jafo, amewasihi wakazi wa jimbo hilo kuzingatia uchangiaji wa mfuko wa maji ili kuwezesha miradi inayotekelezwa kuwa endelevu na kuondokana na kero ambayo imekuwa ikiwakabili kipindi kirefu.

Jafo, alitoa wito huo wakati akizungumza na wananchi wa vijiji vya Kihale, Panga la Mwingereza na Chole, baada ya kukagua maendeleo ya ujenzi wa miradi ya maji inayotekelezwa katika jimbo hilo.

Alisema kuwa atashangaa kuona kuna mwananchi anashindwa kuchangia asilimia 2.5 inayotakiwa kuchangiwa na wanakijijiji kwenye mfuko wa maji, kwani fedha hizo ndizo zitakazowasaidia kukarabati miundombinu pale inapotokea imechakaa ama kuharibika.

Mbunge huyo alisema kuwa, kamati za maji zinatakiwa kusimamia kikamilifu uchangiaji wa fedha hizo, kwani serikali haitaweza kumudu kugharamia vitu vingine baada ya mradi kukamilika na hivyo mchango wa wananchi ndio utakaowezesha miradi hiyo kudumu kwa muda mrefu.

"Wananchi wangu nawaomba tuzingatie kuchangia kile kiasi ambacho kimepitishwa ili kuwezesha kupata asilimia 2.5 ya fedha za mradi, fedha hii haiendi sehemu nyingine itawasaidia kukarabati miundombinu yenu ya maji ili msipate tena shida ya maji, kwani mkishakabidhiwa mradi nyie wenyewe ndio wasimamizi wakuu," alisema Jafo.

Katika miaka mitatu ya uongozi wa Jafo katika jimbo hilo, vijiji 11 vimeanza kupata huduma ya maji karibu na maeneo yao huku zahanati 11 zikijengwa kupunguza umbali wa wananchi kutembea kufuata huduma za afya.

Chanzo; Tanzania Daima