KIBAHA YAZINDUA SACCOS YA VIJANA

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399. 

HALMASHAURI ya Mji wa Kibaha, mkoani Pwani, imeanzisha Chama cha Akiba na Mikopo SACCOS ya Vijana inayoitwa Kibaha Mji Vijana Saccos Ltd, ambayo ilizinduliwa na kiongozi wa mbio za Mwenge wa Uhuru mwaka huu, Bi. Rachel Kassanda.

Akiwasilisha taarifa ya uanzishaji wake, Katibu wa SACCOS hiyo Bi.Rachel Jacob, alisema imesajiliwa mwaka 2013 kwa mujibu wa Sheria ya Vyama vya Ushirika namba 20 ya mwaka 2003, kifungu namba 27.

Alisema lengo la kuanzishwa kwake ni kuinua kipato cha vijana kiuchumi ili kuchochea maendeleo na kupunguza wimbi la umaskini kwa vijana katika jamii.

"SACCOS hii tayari imeanza kubuni wazo la miradi ya kiuchumi kwa wanachama wake na kujiandaa kuanza utekelezaji wake rasmi mapema iwezekanavyo," alisema.

Bi. Jacob alisema miongoni mwa miradi iliyobuniwa ni uanzishwaji wa shughuli za ufyatuaji tofali katika Kata ya Mbwawa, ufugaji kuku wa kienyeji na kilimo cha mbogamboga kwa ajili ya kuongeza kipato cha SACCOS.

Aliongeza kuwa, hadi sasa akiba waliyonayo ni sh. milioni 14 ambapo kati ya fedha hizo, sh. milioni 10 zimetoka Halmashauri ya Mji na sh. 1,500,000 ni fedha kutoka Mfuko wa Jimbo la Kibaha Mjini zilizotolewa na mbunge wa jimbo hilo, Bw. Silvestry Koka ili kuunga mkono jitihada za vijana kujikwamua kiuchumi.

Pamoja na fedha hizo, sh. 2,500,000 ni fedha za wanachama zilizotokana na kiingilio cha sh.10,000, hisa sh. 5,000 na akiba sh.10,000 kwa kila mwanachama.

Akipokea hundi ya mchango wa halmashauri yenye thamani ya sh.10,000,000, Mwenyekiti wa SACCOS hiyo, Bw. Said Ndecha alimshukuru na kumpongeza Rais Jakaya Kikwete kwa juhudi kubwa zinazofanywa na Serikali yake katika kuwajengea uwezo kiuchumi vijana wa Tanzania ili wakabiliane na changamoto ya ajira.

Chanzo:Majira