JAFO: CHANGIENI MIRADI YA MAJI

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399. 

 

MBUNGE wa Kisarawe, Seleman Jafo, amewasihi wakazi wa jimbo hilo kuzingatia uchangiaji wa mfuko wa maji ili kuwezesha miradi inayotekelezwa kuwa endelevu na kuondokana na kero ya maji ambayo imekua ikiwakabili kwa kipindi kirerfu.

Jafo alitoa wito huo wakati akizungumza na wananchi wa vijiji vya Kihale, Panga la Mwingereza na Chole ikiwa ni baada ya kukagua maendeleo ya ujenzi wa miradi ya maji inayotekelezwa katika jimbo hilo.

Alisema kuwa atashangaa kuona kuna mwananchi anashindwa kuchangia asilimia 2.5 inayotakiwa kuchangiwa na wanakijijiji kwenye mfuko wa maji kwani fedha hizo ndizo zitakazowasaidia kukarabati miundombinu pale inapotokea tatizo.

Jafo alisema kuwa kamati za maji zinatakiwa kusimamia kikamilifu uchangiaji wa fedha hizo kwani serikali haitaweza kumudu kugharamia.

"Wananchi wangu nawaomba tuzingatie kuchangia kile kiasi ambacho kimepitishwa ili kuwezesha kupata asilimia 2.5 ya fedha za mradi, fedha hii haiendi sehemu nyingine itawasaidia kukarabati miundombinu yenu ya maji ili msipate tena shida ya maji kwani mkishakabidhiwa mradi nyie wenyewe ndio wasimamizi wakuu,"alisema Jafo.

Alisema mradi unaotekelezwa umegharimu kiasi cha sh. milion 270 na maji yanaanza kutoka wiki hii, hivyo ni vema kila mwananchi akawa mlinzi wa miundombinu ya maji ili kuepusha wizi wa miundombinu.

Wakazi wa kijiji cha Kihale walikua wakitembea umbali wa kilomita 7 hadi 10 kufuata huduma ya maji, hivyo kukamilika kwa mradi huo kutawasaidia kuachana na adha hiyo.

Baadhi yao, Zainab Hamis, Mwanahawa Juma na Hamisi Athumani, walimshukuru mbunge huyo kwa jitihada zake zinazoendelea kutatua changamoto ya maji katika vijiji vya jimbo.

Katika kipindi cha miaka mitatu ya uongozi wa Jafo, vijiji 11 vimeanza kupata huduma ya maji karibu na maeneo yao huku zahanati 11 zikijengwa kupunguza umbali wa wananchi kutembea umbali mrefu kupata huduma za afya. 

Chanzo;Tanzania Daima