WAFANYABIASHARA WAMKATAA MENEJA MISITU

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399. 

BAADHI ya Wafanyabiashara wa mazao ya misitu wilayani Kisarawe, Pwani wamesema hawamtaki Meneja wa Misitu, Methew Mwanuo kwa madai ya rushwa.

Wakizungumza na Tanzania Daima kwa nyakati tofauti wilayani hapo mwishoni mwa wiki, wafanyabiashara hao walisema wanataka wabadilishiwe meneja huyo kwa madai ya kusigina utaratibu wa sheria kwa kuwatoza fedha za vibali na ushuru wa mazao bila kuwapa risiti.

Michael Alphonce, alisema meneja huyo huwatoza faini kati ya sh 200,000 hadi sh 300,000 kila gunia lililozidi kwenye mzigo unaosafirishwa kitendoi.

“Akisha tupiga faini halafu magunia yaliyozidi anayashusha bila kutuambia anayapeleka wapi, hivi tunafanya kazi za maendeleo kwa wote au tunafanya kazi za kuumizana ili wengine wanufaike,” alihoji Alphonce.

Mwenyekiti wa wafanyabiashara hao, Ali Kombe alisema wamechoshwa na usumbufu katika utoaji vibali kwani hauna sehemu moja, vitendo vya rushwa vinavyotishia kuyumba kwa mitaji yao.

Akijibu tuhuma hizo, Mwanuo alisema “Sina la kusema bali natarajia kukutana na wafanyabiashara hao Julai 17 na wandishi wahabari naamini mtakuwepo.

“…Kwa sasa nipo likizo siwezi kuzungumza chochote, naomba tuwasiliane baada ya kikao hicho,” alisema Mwanuo.

Chanzo:Tanzania Daima