Vituo vya misaada vyapewa onyo

BAADHI ya wamiliki wa vituo vya kulelea watoto yatima na wanaoishi katika mazingira magumu wametahadharishwa kuacha tabia ya kuchagua watu,makundi na taasisi za kuwapelekea misaada mbalimbali kwani kwa kufanya hivyo wanawanyima fursa watoto waliopo vituoni humo kupata misaada na hata nafasi ya kukaa na kubadilishana mawazo.

Tahadhari hiyo imetolewa jana wilayani Kibaha na wanakikundi wa kikundi cha Ebeneza cha Dar esalaam wakati wakitoa misaada mbalimbali ya vyakula,vinywaji,nguo na viatu kwa watoto yatima na wanaoishi katika mazingira magumu wanaolelewa kwenye kituo cha Buloma Foundation wilayani humo mkoani Pwani.

Akizungumza baada ya kukabidhi msaada huo,mwenyekiti wa Ebeneza David Stephen amesema msaada ni kama zawadi kwa watoto hivyo siku sote anayepewa si lazima alazimishe jamii impe nini na badala yake anatakiwa kueleza changamoto alizonazo na kisha kusubiri atasaidiwa kipi kati ya alizozitaja.

Stephen amesema kikundi hicho kimefikia hatu ya kutoa rai kwa wamiliki wa vituo vya kulelea watoto yatima baada ya wao kukumbana na changamoto katika baadhi ya vituo walivyopanga awali kuvitembelea na kutoa msaada wa vitu mbalimbali ambapo wao walitakiwa kupeleka tofauti na walivyojiandaa.

Misaada iliyotolewa na Ebeneza kituoni hapo ni pamoja na sembe,mchele,maharage,ngano na sukari kila mmoja kilo 50,nguo  na viatu vya watoto aina na saizi mbalimbali,mafuta ya kupaka,madaftari,juisi,lishe,sabuni za kufulia,mafuta ya kupikia,chumvi,dawa ya mswaki,biskuti vyote vikiwa na thamani ya sh.milioni moja fedha ambazo zimetoka katika mfuko wa kikundi hicho chenye lengo la kusaidiana wenyewe na jamii ya mahitaji maalumu.

Awali mmiliki wa kituo hicho cha Buloma Ana Kyando amesema kwa sasa anahudumia watoto wenye mahitaji maalumu 30 wa umri wa miaka miwili hadi 15 na kati wao wasichana ni 14 na kwamba wamegawanyika kwenye makundi matatu ya waliopatikana baada ya kutupwa vichakani na wazazi wao,waliotelekezwa sehemu mbalimbali kama gesti pamoja na kundi la yatima na mazingira magumu.

Mama Kyando amewashukuru wanakikundi hao kujitolea fedha zao za mifukoni na kuwasaidia watoto na kuitaka jamii kutambua kuwa jukumu la kuwatunza yatima na waishio mazingira magumu ni la kila mmoja na siyo kutegemea Serikali pekee.