KIBAHA SUPER CUP: Lisborn yaichapa Fire 1-0

TIMU ya soka Lisborn imeifunga timu ya Fire zote za Kibaha kwa goli 1-0 kwenye mchezo wa Kibaha Super Cup hatua ya nusu fainali na kufanikiwa kuingia fainali.

Mchezo huo ulipigwa kwenye uwanja wa Bwawani Maili Moja Kibaha ulikuwa mkali na wakuvutia ulihudhuriwa na mashabiki lukuki na kushuhudia kandanda safi toka kwa timu zote mbili.

Goli la washindi lilifungwa na Kulwa Mwanda dakika ya 83 ya mchezo huo na kupeleka kilio kwa Fire ambao walikuwa wamejiandaa kikamilifu kutwaa kombe hilo.

Kwa matokeo hayo Lisborn itachuana na Mwanalugali kwenye hatua ya fainali itakayopigwa keshokutwa kwenye uwanja huo huo ili kuamua bingwa wa michuano hiyo ambayo hufanyika kila mwaka.

Hata hivyo kabla ya kuanza mchezo huo uliingia utata baada ya waamuzi kugoma kwa muda wakidai kuwepo askari kwa ajili ya usalama wao.