‘TUSIWABAGUE, KUWADHARAU WALEMAVU’

na Victor Masangu, Pwani

JAMII imetakiwa kuachana na dhana potofu ya kuwabagua na kuwadharau watu wenye ulemavu wa kutosikia na badala yake wawashirikishe katika shuguli mbalimbali za kimaendeleo pamoja na kuwapatia fursa katika nafasi za uongozi.

Kauli hiyo ilitolewa jana na Mwenyekiti wa Mtandao wa Wanawake Viziwi Tanzania (MWAVITA), Happiness Thomas, alipokuwa akifungua warsha inayohusiana na utawala bora, uwazi na uwajibikaji iliyofanyika wilayani Kibaha.

Alisema kundi la watu wasiosikia limekuwa katika wakati mgumu kutokana na jamii kulinyanyasa kwa kutolitendea haki za msingi na kulinyima fursa ya kushirikishwa katika utekelezaji wa majukumu mbalimbali.

Alisema jamii ya watu ambao hawana ulemavu inapaswa kuhakikisha inawashirikisha kikamilifu watu wenye ulemavu wa kutosikia katika kila jambo ambalo linaweza kuleta mabadiliko makubwa ya kimaendeleo.

“Kwa kweli sisi kama walemavu wa kutosikia (viziwi) tumekuwa katika wakati mgumu sana na hii yote ni kutokana na kubaguliwa na jamii ya watu wasio walemavu, hivyo tunaomba watupe ushirikiano wa kutosha na kuhakikisha wanatushirikisha katika shughuli mbalimbali za kimaendeleo,” alisema Happiness.

Aidha, alisema watu wenye ulemavu wanakabiliwa na changamoto mbalimbali ikiwezo uhaba wa wakalimani wa lugha za alama, kwani wakati mwingine wanapokwenda kushiriki mikutano na vikao mbalimbali wanashindwa kuelewa mambo ya msingi yanayozungumzwa.

Naye meneja wa mradi wa mtandao huo, Aneth Gerana, alisema watu wenye ulemavu wana uwezo mkubwa katika kutekelza majukumu mbalimbali ya kuleta chachu ya maendeleo, hivyo serikali inapaswa kuhakikisha inawashirikisha katika nafasi mbalimbali za uongozi kama ilivyo nchi nyingine.

Chanzo: Tanzania Daima