MWENYEKITI CCM AWAANGUKIA WAZEE

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399. 

 

MWENYEKITI wa Kijiji cha Mlamleni Wilaya ya Mkuranga mkoani  Pwani, Hamisi Linyimuka (CCM), amewaomba radhi wazee wa mtaa wa Videte kwa kosa la kumilikisha ardhi.

Hatua hiyo ilikuja baada ya Mwenyekiti huyo, kugawa eneo la Ofisi ya mtaa kwa mkazi wa Dar es Salaam, Shamila Masawe, kinyume cha sheria.

Mwenyekiti huyo, aliwekwa kitimoto na wazee wa mtaa huo katika kikao kilichoitishwa juzi na Ofisa Mtendaji wa Kata ya Tambani, Abasi Likonda, ambacho kilikuwa kikijadili kwa kina juu ya tuhuma hizo.

Akizungumza kwa niaba ya wazee hao, Omary Silima alisema katika eneo hilo ambalo tayari ujenzi wa ofisi unaendelea, walitenga eneo lenye upana wa mita 18 na urefu mita 40 ambalo wanatarajia kuchimba kisima kwa ajili ya huduma ya maji kwa kazi wa mtaa  huo.

“Eneo alilomilikishwa huyu Masawe ni la kwetu tumenunua kwa nguvu zetu wenyewe, lakini mwenyekiti ameliuza bila ya kutushirikisha jambo ambalo tunapingana nalo kwani anatumia uongozi wake vibaya,” alisema.

Naye mwenyekiti wa mtaa huo, Yusufu Kigundula maarufu kama Lule, alisema alishangazwa na mwenyekiti huyo kumtaka aandike hati ya pili ya eneo hilo, na kwamba eneo hilo litakapochimbwa kisima, Masawe atachota maji mpaka mwisho wa maisha yake bila kulipia.

Hata hivyo, Lule alisema eneo hilo litabaki kuwa la serikali na kisima kitakachochimbwa kitakua cha serikali na kitatumiwa na wananchi.

Chanzo:Tanzania Daima