'Watanzania msing'ang'anie rasilimali'

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399.

WATANZANIA wametakiwa kuacha kung’ang’ania rasilimali zilizopatikana kwenye maeneo yao badala yake wakubali rasilimali hizo zitumiwe na Watanzania wote ili nchi isiingie kwenye mifarakano ya kugombea rasilimali hizo.

Hayo yalisemwa jana mjini Bagamoyo na Katibu Mkuu Kiongozi Balozi Ombeni Sefue, wakati akifungua Kongamano la Viongozi wa Mkoa wa Pwani juu ya umuhimu wa rasilimali ya gesi kwenye mkoa huo.

Alisema kuwa Watanzania wanapaswa kutambua kuwa rasilimali zilizopo hapa nchini ni kwa watu wote na si wa eneo fulani.

"Tukipata tamaa kila upande kung’ang’ania rasilimali zake tutagawanyika na tutatawanya kile ambacho Mwenyezi Mungu ametujalia hivyo tuelewane kitaifa ili kila Mtanzania anufaike nazo kwani hata Mungu atatubariki," alisema Balozi Sefue.

Balozi Sefue alisema kuwa ni kweli kila palipo na rasilimali kokote nchini ni lazima watu wa eneo husika wanufaike lakini kushindwa kufikia muafaka itasababisha amani kuvunjika endapo hakutakuwa na maridhiano ya matumizi ya rasilimali hizo.

Kwa upande wake Mkuu wa Mkoa wa Pwani Mwantumu Mahiza akimkaribisha Balozi Sefue alisema kuwa lengo la kongamano hilo ni kuwapa uelewa wadau wakiwemo viongozi wa dini, watendaji wa Serikali na wadau wengine wa maendeleo.

Mahiza alisema kuwa mbali ya kujenga uelewa pia ni kuwatumia viongozi wenye ushawishi kwenye jamii na kuwa na majadiliano ya rasilimali hiyo pia ili waweze kutoa elimu juu ya umuhimu wa masuala ya gesi na kufanya utafiti wa rasilimali kwenye maeneo yao.

Chanzo;Habari Leo