Chalinze waelezwa kwanini Ridhiwani anawafaa

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399.

VIONGOZI waandamizi wa Chama Cha Mapinduzi (CCM) wamewaomba wakazi wa Jimbo la Chalinze kumchagua Ridhiwani Kikwete ili aende kusaidia kudhibiti ubadhirifu Halmashauri ya Wilaya ya Bagamoyo.

Katika siku ya sita ya kampeni hizo jana Mbunge wa Jimbo la Mchinga mkoani Lindi, Saidi Mtanda alisema kuwa mgombea huyo ana uwezo mkubwa wa kudhibiti mchwa kwenye halmashauri hiyo.

Mtanda akimnadi kwenye vijiji vya Visakazi, Mwidu, Ubena na Kaloleni, aliwaambia wanavijiji hao kutofanya makosa kwani Ridhiwani ni chaguo sahihi na ana uwezo mkubwa wa kukabili changamoto hizo zilizopo kwenye halmashauri hiyo.

Alisema kuwa endapo wananchi wa Jimbo la chalinze watampatia mgombea huyo ridhaa ya kuwa mbunge wa jimbo hilo pia atawabana watendaji wa vijiji ambao hawasomi kwa wananchi mapato na matumizi kama sheria inavyowaelekeza.

"Kusoma mapato na matumizi ya kijiji kila baada ya miezi mitatu ndiyo taratibu lakini baadhi ya viongozi na watendaji hao wamekuwa wakikaa muda mrefu bila ya kusoma taarifa hizo kwa wananchi," alisema Mtanda.

Kwa upande wake mgombea wa ubunge Jimbo la Chalinze kwa tiketi ya CCM Ridhiwani Kikwete amewaahidi wakazi wa Kata ya Ubena kutatua kero za wananchi wa kata hiyo ikiwemo tatizo la ukosefu wa maji, pamoja na kuwasimamia viongozi wa vijiji kuitisha mikutano ya vijiji mara kwa mara.

Chanzo;Habari Leo